كلنا شفنا افلام اجنبى ، ودايما بنلقى البوليس أول لما يجى يقبض على حد يقولة ، من حقك ممتكلمش ألا فى حضور محاميك ، انت رهن الاعتقال بتهمة كذا . وكنا دايما بنسئل هو احنا لية البوليس المصرى مش بيتعامل معنا بحترم كدة ؟ ولية القانون مش بينص على كدة ؟ المعلومة الجديدة ان المادة 193 من قانون الاجراءات الجنائية ، بتلزم الداخلية أن فى حالة لو حد اتقبض علية او اتحبس احتياطيا لازم يبلغ فورا عن سبب حبسة وكمان لية الحق فى أنة يتصل بأهلة ومحامى فى الحالة . يعنى انت اتحبس وأدخل على المامور أو بتوع المباحث وصمم أنك تتصل بمحاميك أو اهلك بموجب المادة دى ( يبلغ فوراً كل من يقبض عليه أو يحبس احتياطيا بأسباب القبض عليه أو حبسه ، ويكون له حق الاتصال بمن يري إبلاغه بما وقع والاستعانة بمحام ، ويجب إعلانه على وجه السرعة بالمتهم الموجهة إليه. ولا يجوز تنفيذ أوامر الضبط والإحضار وأوامر الحبس بعد مضي ستة أشهر من تاريخ صدورها ، ما لم يعتمدها قاضي التحقيق لمدة أخرى.) طبعا أنا عارف أن فى ناس هتقول دة كلام ومش واقع ومش دة اللى بيحصل ، انا عارف كل الكلام دة لكن الخطوة الاولى فى أننا نأخد حقوقنا اننا نعرفها والخطوة التانية أننا نطلب بيها .
سعيد فايز المحامى
ليست هناك تعليقات:
إرسال تعليق