رجعنا تانى ، أيصال الامانة

بقلنا فترة كبيرة وقفين وعايزن نرجع نتعلم مع بعض تانى حقوقنا ، وأنهاردة اختارنا موضوع مهم جدا لانة متداول بستمرار هو ايصال الامانة ، كمان الجديد انى مش انا اللى كاتب ، يعنى هنشوف افكار جديدة وطريقة عرض جديد ة

مع تحياتى

سعيد فايز المحامى

حكايات عم منحوسحكاية النهاردة من أصعب الحكايات اللي مريت بيها .. حكاية وريتني الويل .. في يوم جت مراتي منحوسة ..ربنا ياخـ..خليها ماسكة في خناقي وعايزة ثلاجة جديدة بدل الثلاجة القديمة اللي باظت بقالها سنين . طب يا ستي أستني شوية بس لغاية لما يتعدل الحال ..لا وألف لا ..أتصرف دلوقتي ما أنت الراجل .. طب أتصرف أزاي بس .. جت لي فكرة أن أشتريها بالتقسيط .. أيوة هو دة الحل . رحت جبت الثلاجة وكمان معاها تلفزيون ..ماهو أنا أصلي لقيت المقدم بسيط والحكاية كلها في شوية ورق يتمضي .. إيصالات أمانة . عادي ما كل الناس بتعمل كدة . الوصل الواحد بـ 100 جنية قيمة القسط الشهري . دفعت شوية أقساط وبعد كدة أتعذرت شوية فأتأخرت شهرين ما دفعتش . فوجئت بالراجل صاحب الأقساط رافع عليا قضية بــإيصال منهم بـ 10000 جنية . ويا الدفع يا الحبس . أعمل أية ؟؟ الراجل رفض انه يتنازل إلا لما أدفعلة كل الأقساط الباقية وكمان 2000جنية زيادة . رحت للمحامي ودة اللي حصل : المحامي : ما تخافش يا عم منحوس .منحوس : ما أخافش أزاي .. دي إيصالات أمانة ..يعني تحبس أكتر من الشيك .المحامي : الكلام دة غلط يا عم منحوس .. الاثنين بيعاقب عليهم قانون العقوبات رقم 58 لسنة 1937 والمعدل بعد كدة بقوانين كثيرة أخرها القانون رقم 93 لسنة 1995 . بس كل الحكاية أن الشيك ليه مواد عقوبة مختلفة عن إيصال الأمانة .منحوس : يعني أية الكلام ده .. أنا مش فاهم حاجة ؟ المحامي : يعني يا عم منحوس . إيصال الأمانة عقوبته زيها زي الشيك . إيصال الأمانة بيعاقب عليه بنص المادة 341 عقوبات . أما الشيك بيعاقب علية المادة 337 عقوبات اللي أتلغت بعد كدة بموجب قانون التجارة رقم 17 لسنة 1999 وأبتدي هو اللي ينظم التعامل في الشيكات .,منحوس : خلينا في إيصالات الأمانة اللي أنا ماضي عليها .المحامي : بص يا عم منحوس . جريمة خيانة الأمانة اللي متهم بيها طبقاً لنص المادة 341 عقوبات ليها ثلاث أركان للعقاب بيها . الركن الأول هو الركن المادي ..وده المقصود بيه المبلغ المادي اللي تم تبديده . الركن الثاني وهو الركن المعنوي .. وهو النية في التبديد . اما الركن الثالث هو ركن التسليم .. يعني تكون فعلا ً أستلمت المبلغ المكتوب قيمة الإيصال .منحوس : يا أستاذ أنا ماضي علي إيصال بـ 100 جنية علشان القسط . هو رفع عليا بـ 10000 جنية .المحامي : في الحالة دي قدامك طريق من أثنين تثبت بيهم حقك في الجنحة دى . الطريق الأول أنك تطعن بالتزوير علي صلب الإيصال علشان الطب الشرعي يثبت القيمة الحقيقية اللي أنت كاتبها بخطك وأيه هو اللي تم تزويدة بعد كده من أصفار أو أرقام . أما الطريق الثاني أنك تدفع بأنتفاء ركن التسليم . منحوس : أه يعني قصدك يا أستاذ أني أقول للمحكمة أني أنا ما أخدتش المبلغ دة منه ..بس المجكمة هتصدقني أزاي ..ده أنا منحوس.المحامي : ليك أنك تثبت بكافة طرق الأثبات كلامك دة ومنها سماع أقوال الشهود . يعني أنت يا عم منحوس لوعندك أثنين شهود يقولوا أنك مضيت قدامهم علي الإيصال ده ضمان لقيمة القسط الشهري وأقتنعت المحكمة بكلامهم تاخد برآه في الشق الجنائي وأحالة الدعوي المدنية للمحكمة المختصة .منحوس : برآة !!!المحامي : أيوة .. وكمان في طعن بعدم دستورية نص المادة 341 عقوبات أمام المحكمة الدستورية العليا ومازال متداول في المحكمة .منحوس : يعني ممكن تتلغي أصلا ً المادة دي ؟!المحامي : ممكن أه وممكن لا .. ما حدش يقدر يعرف قبل صدور الحكم . لكن اللي من حقك تعمله أنك ترفع جنحة خيانه إئتمان طبقا ً لنص المادة 340 عقوبات ضدة . لأنه أستخدم الإيصال ضدك رغم أنه موضوع عندة علي سبيل الأئتمان .منحوس : وهو اللي يتحبس ؟المحامي : لو ثبتت ضدة جريمة خيانة الأئتمان . منحوس : يا سلام .. دة القانون دة بحره واسع قوي ..بس أنا توبة من دي النوبة .. وإن شالله تتفلق مراتي منحوسة مش جايب حاجة بالقسط تاني . بقلم أسامة ميخائيل المحامى